Back Vasco da Gama Afrikaans ቫስኮ ደጋማ Amharic Vasco da Gama AN वास्को दा गामा ANP فاسكو دا غاما Arabic ڤاسكو دا ݣاما ARY فاسكو دا جاما ARZ ভাস্কো দা গামা Assamese Vasco da Gama AST Vasco de Gama AVK
ho comde almirante
(„der Graf und Admiral“)
Dom Vasco da Gama (ˈvaʃku ðɐ ˈɣɐmɐ), Groof vo Vidigueira (* um 1469 in Sines; † 24. Dezämber 1524 z Cochin, Indie) isch e portugiisische Seefaarer gsi. Er het dr Seewääg um s Kap vo dr Guete Hoffnig uf Indie entdeggt.
D Pordugiise häi scho under em Heinrich em Seefaarer e Wääg afo sueche, zum die arabische, persische, venezianische und andere Vermiddler vo indische Gwürz uszschalte, wo wägenä die Brodukt in Öiropa seer düür gsi si.
Am 8. Juli 1497 isch dr Vasco da Gama mit vier Schiff z Pordugal abgfahre. Er isch gege Süde gseeglet, um s Kap vo dr Guete Hoffnig und isch am 25. Novämber in dr Mosselbaai glandet. Am 7. April 1498 isch er z Mombasa aachoo und vo dört uf Malindi. Dr Sultan dört het em e Nawigator mitgee und am 20. Mai 1498 isch dr Vasco da Gama as erste Öiropäer, wo um Afrika ume gfaare isch, z Calicut an dr Malabarküste vo Kerala glandet. Er het kostbari Gwürz ufglaade und 1499 si d Schiff wider z Pordugal gsi.
In de Joor druf häi d Pordugiise nöiji Räise uf Indie gmacht: die zwäite under em Pedro Álvares Cabral, wo uf dere Räis im Joor 1500 Brasilie entdeggt het, und die dritti 1501 under em João da Nova. Erst die vierti Faart 1502 isch wider under em Kommando vom Vasco da Gama gsi. Die arabische und indische Händler häi iir Monopol welle verdäidige und häi die 15 Schiff vom Vasco da Gama mit mee as 100 Schiff aagriffe. D Pordugiise si aber mit Kanone bewaffnet gsi und häi sich erfolgriich chönne verdäidige.
Dr Vasco da Gama het denn die Pordugiisische Faktoreie z Cannanore und Cochin usbaut und 1503 z Cochin die ersti öiropäischi Burg z Indie, s Fort Manuel, baut. In e baar Joor isch Pordugal die füerendi Seemacht im westlige Däil vom Indische Ozean worde.
1503 oder 1504 isch dr Vasco da Gama zrugg uf Pordugal, und er isch am Hoof ufgnoo worde. 1519 het em dr Köönig Manuel dr Ditel Conde de Vidigueira (Groof vo Vidigueira) gee. 1524 isch er zum Vizeköönig vo Indie ernennt worde, isch zrugg uf Indie und het dört d Zivil- und d Milidäärverwaltig afo nöi organisiere. Aber er isch chrank worde und scho noch drei Möönet z Indie isch er im südwestindische Kochi gstorbe.